Comezamos o curso 2026 - 2027 !!

   Xa estamos de volta!

  Benvidas e benvidos ao curso 2026 - 2027. 

  O EDLG xa está preparando as novas actividades para este curso, estade atentas e atentos ao blog...

 

Remata o curso 2025-2026

  Hoxe remata o curso para o noso alumnado.

  Dende o E.D.L.G. queremos darlle as grazas a toda a comunidade educativa pola súa partipación e colaboración nas actividades que propuxemos este curso.

  Parabéns ás nenas e nenos e ás familias polo traballo feito este curso.

  Vémonos en setembro, bo verán rapazada!!

 

Revista Escolar 2025 - 2026

  Presentamos a revista escolar elaborada polo equipo do EDLG co resumo das actividades feitas neste curso escolar.

  Premede na imaxe da portada para vela.

 

 

Letras Galegas 2026: Concurso de chistes

   Rematamos as actividades das Letras Galegas co vídeo do Concurso de chistes.

 

Letras Galegas 2026: as imaxes dos Contos Compartidos

   Unha das actividades programadas para as Letras Galegas son os "Contos Compartidos".

  O alumnado trouxo para o cole un conto feito coa súa familia. Despois fixemos unha actividade grupal na que participou todo o centro, de Infantil a 6º de Primaria. Xuntámonos nos patios e compartimos os contos para facer un tempo de lectura no exterior. Os maiores léronlle os contos ao alumnado de Infantil.

  Gracias ás familias pola súa colaboración na actividade.

 

Día das Letras Galegas

   Hoxe domingo, 17 de maio, celebramos o DÍA DAS LETRAS GALEGAS.

   Queremos amosarvos o mural feito para este día.

   Moitas grazas a toda a comunidade educativa pola vosa colaboración nas actividades desta semana!! 

 

Letras Galegas 2026: visita de Xacarandaina

  Dentro das actividades das Letras Galegas, hoxe tivemos a visita dunhas compoñentes do grupo Xacarandaina.

  No tempo do recreo houbo bailes nos patios de Infantil e Primaria.

  Moitas gracias polas actuacións!

 

As flores da Festa dos Maios

   Esta semana rematamos as flores para a Festa dos Maios.

  Deixamos unha mostra do traballo feito polo noso alumnado para ese día.

 

Festa dos Maios no Barrio das Flores

   A Plataforma Veciñal do Barrio das Flores organiza o 9 de maio a Festa dos Maios no barrio.

   Nesa data haberá unha xornada familiar con música e diversas actividades relacionadas con esta tradición galega.

  A asociación convida a toda a comunidade educativa a participar na elaboración dos maios o sábado pola tarde. O alumnado do noso cole está elaborando flores para esa data.

Vémonos o sábado na Festa dos Maios!!

 

   

Letras Galegas 2026: Contos Compartidos

  Outra das actividades programadas para as Letras Galegas son os Contos Compartidos.

  Propoñemos ás familias que participen desta actividade creando un pequeno relato en galego e a bolígrafo coas súas fillas e fillos. A extensión sería dunha "carilla". Recordade que este ano o Día das Letras Galegas adícase a Begoña Caamaño polo que estaría moi ben que unha personaxe do conto se chamase como a autora homenaxeada.

  O conto asinarase soamente co nome da alumna ou alumno (sen apelidos nin curso) e o parentesco coa persoa que fixo o relato. Por exemplo: "Pepa e a súa avoa".

  Todos os contos serán compartidos con todo o alumnado e familias do centro, xa que faremos copias para que haxa contos para todos.

  A data límite para que o alumnado entregue o conto na súa titoría será o luns 11 de maio. 

  Deixamos un modelo para que vexades como podemos presentar o conto.

 

Letras Galegas 2026: Concurso de chistes

  Unha das actividaedes que imos facer para celebrar o Día das Letras Galegas é o Concurso de chistes.

  O alumnado vai preparar os seus mellores chistes para contar nas aulas e subir ao blog.

 

 

Letras Galegas 2026: Begoña Caamaño

  Xa estamos en maio!

  Como xa sabedes, o 17 de maio celebramos o Día das Letras Galegas.

  Este ano adícanse as Letras Galegas a Begoña Caamaño.

  Este mes iremos subindo ao blog materiais sobre as Letras Galegas.

  O primeiro que queremos amosarvos é o cartel que fixeron no Seminario Galán.

  Se premedes no cartel ides a súa web e alí atoparedes os materiais que elaboraron este ano para o Día das Letras Galegas.

 

Xogolandia: as portas das aulas

   Temos as portas das aulas do cole decoradas coa temático de Xogolandia.

    Que xogo preferides? 

 

Ano Otero Pedrayo

  Este ano 2026 será o Ano Otero Pedrayo. 

  O Parlamento de Galicia aprobou unha declaración institucional pola que dedicará o ano 2026 á figura do escritor, ensaísta, xeógrafo, político e profesor ourensán con motivo do seu 50º cabodano e do centenario da publicación da Guía de Galicia, unha das súas grandes obras.

  Para esta celebración varios centros de ensino coruñeses e ourensáns elaboramos uns recursos que poñemos á vosa disposición.

 Picando na imaxe teredes unhas actividades interactivas en formato genially sobre Otero Pedrayo.

8 de marzo: Día Internacional da Muller

  Hoxe celebramos o Día Internacional da Muller. 

  Para celebralo, queremos compartir o traballo feito polo alumnado do cole.

  Realizaron un mural sobre mulleres deportistas que alcanzaron grandes logros nas súas especialidades.

 

Carteo co CEIP Novo Mesoiro

   Seguindo a actividade iniciada no curso pasado, o alumnado de 5º de Primaria recibío o segundo envío de cartas do alumnado do CEIP Novo Mesoiro.

   Xa estamos preparando as cartas de resposta dende o noso cole.

 

Podcast sobre Rosalía de Castro

   Pois aquí temos o podcast feito polo alumnado de 6º de Primaria sobre as actividades feitas na Semana de Rosalía de Castro.

 

 

Mural na Semana de Rosalía de Castro

   Non queremos deixar rematar esta semana adicada a Rosalía de Castro sen presentarvos o noso novo mural.

  A que quedou chulísimo?

 

As imaxes da actividade do Día de Rosalía

   Todo o alumnado participou esta semana na busca de pistas sobre Rosalía de Castro por todo o colexio.

  Descubriron novas curiosidades sobre a poetisa e traballaron en equipo. 

 

Día de Rosalía

   Hoxe 23 de febreiro celebramos o Día de Rosalía.

  Relacionado co proxecto deste ano (Xogolandia), o alumnado participará nun xogo de pistas que estarán agochadas polo noso cole. En cada unha atoparán unha curiosidade de Rosalía elaboradas polo alumnado de 6º de Primaria. As pistas rematarán na biblioteca onde todos os cursos recibirán un agasallo por rematar as pistas.